الأربعاء، 31 أكتوبر، 2012

جهاز العروسة نصايح من عروسة جديدة لكل العرايس

--> بسم الله الرحمن الرحيم
السلام عليكم ورحمة الله وبركاته
أهلا بيكم يا أحلى عرايس النهاردة موضوعنا مختلف شوية ليه لأنه عبارة عن نصايح للعرايس اللي بتجهز من عروسة جديدة
 اولا:الجهاز

انا هتكلم عن نفسي ف كل حاجه اولا ماما بدأت تجهزني بحاجات خفيفه من وانا ف الجامعه واول ماتخطبت ابديت مشوار الجهاز الصح بس نصيحتي هاتي كل حاجه ع مهلك خالص كل مايبقي متوفر فلوس انزلي هاتيلك حاجه ان شاء الله رفايع المطبخ لان بجد بجد الجهاز ده بيحتاج مصاريف كتير جدا مع العلم اني منوعه مابين الغالي والمعقول وحتي الرخيص ومع ذلك برضه ماما صرفت كتير ع جهازي وحمدت ربنا اني بنت واحده ونصيحه بقي ف الجهاز بالنسبه للمفروشات والله العظيم المفرش السوري ده ولا ليه اي لزمه بفلوسه هاتيلك اي مفرش شيك من كاربت سيتي او من اي حته حسب امكانيات كل واحده المهم بلاش المفارش الي فيها شغل وخرز كتير ده والله فلوس ع الفاضي 


وجوزك من اول يوم هيقولك شيليه علشان بيشوك وماتكتريش ف البطاطين هما بطنيتين ولحاف ومفرش شتوي ومفرش صيفي او اتنين وكوفرته وكفايه جدا وبرضه حسب ظروف كل واحده والملايات ياريت كلها تبقي قطن وبرضه نوعي بين الغالي والرخيص شويه وهاتي مثلا 12 ملايه 8 ساده و4 مشجر والفوط نفس الكلام وحتي الفوط الشخصيه برضه 12 كفايه جدا بس دول بالذات بلاش تسترخصي فيهم هاتيهم خامتهم كويسه والبشاكير ماتكتريش والبرانس الفرداني ارخص واشيك اللي ف الشنطه ده خامته مش حلوه وفي حاجات ملهاش اي لزمه ندخل بقي علي هدوم العروسه اولا كده خدي كل اللبس بتاعك المناسب والكويس وانتي بنت هينفعك جدا وبعدين نوعي بقي مابين بيجامات طويله وبرمودا وياريت تبقي قطن لان الستان شكلها حلو بس بتحرر اوي وكاشات وبيجامات شورت وبرضه ماتكتريش اوي وجيبات واحده اواتنين وده مش قليل والله وكام بادي كده وطبعا روب صيفي قطن واسدال والانجيري بقي برضه نوعي مابين الغالي والرخيص واوعي تكتري والله هتلاقي نفسك عندك كتير ومش بيتلبسوا كتير ومش هينفع تشتري بعد كده من باب التغير وع فكره الارواب الستان برضه ملهمش لازمه ولو هتلبسيهم يبقي ف الشتا احسن والاندرات انا عملت ايه بقي نزلت الموسكي مع مامتي وجبت بالجمله يعني دسته او نص دسته ونوعت ف الاشكال يعني نص دسته اشرات كارينا ع دسته اندرات قطن مثلا وجبت برضه فرداني وهاتي اندرات تليق ع الانجيري اللي من غير اندر وكتري شويه من الاندرات القطن وبالنسبه بقي للبرا هاتيلك 6 اطقم اندر وبرا وده كفايه جدا وكتير كمان والله وع فكره شرا الاندرات بالجمله دي هيوفر معاكي شويه وبالنسبه لشباشب الانجيري انا جبت اربع الوان وبيليقوا ع جميع الوان اللبس سواء لانجيري او لبس البيت العادي وهما الاسود والاحمر والسيلفر والابيض واوعي تتعودي تمشي حافيه ف شقتك ادام جوزك وياريت الشباشب تبقي مش عاليه اوي علشان تريحك اما جهاز المطبخ بقي 

 اولا بالله عليكوا اللي تقدر تجيب طقم الحلل تيفال زهران ياريت افضل بكتيييييير جدا وهيريحك هو غالي شويه بس لو عملتوا زي ماقولتلكوا انكوا تشتروا الحاجه واحده واحده هتعرفوا تجمعوه والطاسات طبعا اما زهران اما تيفال تركي مايختلفش عنه كتير وطقم الحلل الاستانلس والله ماليه اي لزمه انا جايبه الغالي وبرضه وحش وطقم الصاج مش عملي اوي برضه ممكن الالومنيوم يبقي حلو بس انا مش جيباه الصراحه والصواني برضه تيفال وبيركس وصينيه للبيتزا و2 قالب كيك وكفايه جدا رفايع المطبخ بقي نوعي يعني هاتي الرخيص والمتوسط شويه بس بلاش طقم التوزيه التيفال حتي لو تيفال زهران انا جيباه ووحش جدا بيسيح لو نسيته ف الحله وكمان بيعل ريحه مش حلوه ف الاكل عوضا عنه هاتي طقم خشب شيك وعملي وحتي المساكه التيفال دي بلاش هاتي الاستانلس حاولي توحدي لون الاطباق البلاستيك بتاعت مطبخك تكون مثلا لون مطبخك او لونك المفضل بتبقي شيك اوي وماتكتريش من الكاسات واطقم الكوبايات وهاتي طقم صيني وبايركس بس اللي هو 38 قطعه ده وياريت ياريت تجيبي كام طبق ميلامين كده وتنوعي ف احجامهم لانك هتحتجلهم جدا انا كتير بحتاس لاني ماجبتش بس هجيب ان شاء الله وهاتي غطاء كمان للاطباق علشان لو ف اكل فاض او حاجه بدل ماتغطيه بطبق تاني غطيه بالغطا ممم هاتي طقم سكاكين واحد بس كفايه اوي وطقم المقصات والله ومقص الفراخ مالوش لزمه وهاتيلك مج او مجين بلاستيك علشان لو جالك اطفال وكام طبق كده صغير علشان لو حد هياكل هاتيلك مصفاه كبيره اومتوسطه وواحده صغيره هتحتاجيها كتير واهم حاجه تاخدي بالك منها وانتي بتشتري حاجتك تبقي عارفه لو هتفرشي شقتك مودرن ولا استيل لانها بتفرق والله سواء ف المفروشات او حاجات المطبخ والنيش طبعا خلي بالك كويس جدا من الموضوع ده متهيالي انا كده قولت كل حاجه ف الجهاز اه بالنسبه للاماكن بقي اللي كنت بروحها معظم الاماكن كانت اما اسواق المصريه (اسواق الموسكي والعتبه)ودي ليها كذا فرع اللي عايزعهم يقولي وكنت بروح الموسكي طبعا ف كل حاجه العتبه مافيهاش حاجات حلوه خالص انا نزلتها مره واحده بس هما دول اكتر مكانين جبت جهازي منهم وروحت برضه كاربت سيتي بالنسبه للمفروشات بس كنت بنزل ف الوكازيون بيعملوا تخفيضات كويسه وبالنسبه للهدوم مابين روكسي ووسط البلد واسكندريه لان بابايا الله يرحمه اسكندراني فبروح اسكندريه كتير وبشتري معظم اللبس اما من معارض زي اللي ف الشاطبي او من شارع خالد بن الوليد او المنشيه ومحطة الرمل وطبعا الاسكندرانيه عارفينهم اه ونزلت كمان حمام التلات طبعا ودرب سعاده ومول الازهر بس فاصلي ع اد ماتقدري معلش هو كده هتتبهدلي شويه
وبالنسبة لكاربت سيتي 
بصي يا ستي كاربت سيتي ده بيبع مفروشات ولحفه وكوفرتات وفوط وحاجات تانيه كتير بس هو غالي شويه انا كنت بجيب من فرع جسر السويس اللي بعد اشارة روكسي لو جايه من رمسيس وكنت بنزل ف الاوكازيزنات هو حاجاته فخمه جدا يعني ممكن تلاقي كفر اللحاف بألف وشويه الكفر بس من غير اللحافاحلى ابتسامة ولو عايزه ملايات فوربد ممكن تروحي الغوريه ف هناك بيبعوا انتاجها بس بيبقي فرز تاني مش اول وبتبقي حلوه برضه وممكن تروحي اي فرع لفوربد هتلاقي المفروشات دي برضه لحفه وملايات وكوفرتات ولوروحتي صيدناوي اللي ف طلعت حرب والله هتلاقي ملايات تحفه لانه جدد استايله بعد التجديد اللي عمله انا جايبه من هناك ملايه حلوه اوي ب160 ج قطن 100%
 وبالنسبه للرفايع دي انا جبت بلاستيكات المطبخ والحمام كلها ف يوم واحد من مكان واحد وهو المرشدي اللي ف اكتوبر بس يفضل تجيبي البلاستيكات دي من مصنع الهلال والنجمه اللي ف الموسكي ده هيبقي ارخص ويوفر معاكي والمقصات والمقاور جبتها من المحلات اللي جنب مول الازهر قولتها ف الجزء التاني او التالت من الموضوع مش فاكره والله وكمان ف مره نزلت معارض 6 اكتوبر واشتريت حاجات كتيييييييييير من هناك بس صدقيني مش هتقدري تجمعي الحاجات كلها ف يوم واحد غصب عنك هتنسي حاجات وتجبيها ف مرات تانيه

وبالنسبة للبرنس 
 
جبته من حلاوه اللي ف العتبه انا شوفته بالصدفه بصراحه ماكنتش اعرفه هو عامل زي صيدناوي كده والبرنس الحريمي كان قطن 100% وكان ب125 تقريبا والبرنس الرجالي انا جبته قطيفه من بره وقطن من جوه يعني زي الفوطه كده بس قطن وكان بحاجه وتمانين مش فاكره اوي

 ولو انتي بتجهزي بنتك أو أختك 
 نصيحتي هاتي كل اللي تقدري عليه من دلؤقتي معادا الحاجات الكبيره زي مثلا الاجهزه وطقم الصيني وبلاش كمان لبس من دلؤقتي يعني الحاجات اللي ممكن يطلع منها جديد وكمان ماتجبيش اجهزه كهربائيه غير قبل فرحها بفتره قصيره علشان تستفادو بضمان كل حاجه لو حصل حاجه ف الاجهزه لاقدر الله وهاتلها بقي الرفايع دي بتلم فلوس بالهبل واي حاجه ماتبطلش هاتيلها واحده واحده وممكن البطاطين برضه بلاش لحفه علشان بيطلع منها جديد كل شويه وياريت تجبيلها حلل وصواني تيفال كل ماامكن ان شاء الله تجبيهم حله ف حله دول مابيبطلوش ابدا وشكلهم حلو وشيك كمان وبلاش تجيبي حاجات ازاز بدري علشان ماتتكسرش يعني ممكن حاجات خفيفه وياريت هي اللي تختار الحاجه معاكي


يا رب الموضوع يكون فادكم يا بنات وكل جديد هيكون موجود مع أحلى دنيا باذن الله
  -->

ليست هناك تعليقات:

إرسال تعليق